Паёми табрикии Раиси ноҳияи Зафаробод Муродзода Муқим Қаюм ба маносибати Рӯзи Модар

06 Март 2025

Модарони мушфиқ, бонувони гиромӣ ва хоҳарону духтарони азиз!

Таҷлили Рӯзи модар дар кишвари мо ҳамасола аввали фасли баҳор ҷашн гирифта мешавад, ки рамзи нафосату поксириштӣ, зебоӣ ва муҳаббату садоқат нисбат ба Зан-Модар арзёбӣ мегардад.

Агар баҳор арӯс ва олиҳаи ҳусни сол маънидод шавад, пас Зан-модар рамзи покӣ, озодагию назокат ва меҳрубонию садоқат ба ҳисоб меравад. Маҳз дар ин айём таҷлили Рӯзи модар неку хуҷаста аст, зеро модар оғозгари зиндагӣ, бахшандаи ҳаёт ва ибтидои нияту иқдоми тоза мебошад.

Аз ин рӯ, бо эҳтиром ва самимият фарорасии фасли зебои сол – баҳори оламафрӯз ва ҷашни модаронро ба тамоми занону модарони мушфиқ ва бонувони меҳрубони ноҳияамон табрик гуфта, саломативу хушбахтӣ ва хонаободиву саодати рӯзгор таманно менамоям.

Зан пеш аз ҳама модар, хоҳар, ҳамсар ва дӯсти наздик ба ҳисоб меравад. Зан зеботарин офарандаи ҳастии рӯи замин аст. Модар офарандаи ҳаёт, пайвандгари наслҳо, сарчашмаи меҳру муҳаббат ва нерӯбахши рӯҳу ҷон мебошад. Маҳз ба ҳамин хотир мардуми тоҷик ва умуман, аҳли башар ба ин тимсоли беҳамтову ҷовидона арҷ мегузоранд, бузургии ӯро ситоиш менамоянд ва дар наздаш ҳамеша сари таъзим фуруд меоранд.

Модар ягона мавҷудест, ки инсон меофарад, ба ӯ ҳаёт мебахшад, ӯро дар оғӯши гарму пурмеҳри худ мепарварад, аввалин суханҳо ва гузоштани нахустин қадамҳоро ба тифлаш ёд медиҳад, фарзанди хешро бо ҳазор нияту орзуҳои нек ба воя мерасонад.

Модар шахсест, ки шабу рӯз ба хотири роҳату осоиши тифлаш заҳмат мекашад ва намегузорад, ки фарзанди ӯ ранҷу озоре бинад. Вай ҳамеша дар талош аст, ки фарзандаш солиму бардам ба камол расад, соҳиби одобу маърифат, илму дониш ва касбу ҳунар гардад ва дар оянда ба ҷомеа хизмати шоиста намояд. Яъне дар шуури насли наврас ташаккул додани эҳсоси муҳаббат ба донишу маърифат, одобу ахлоқ, нангу номус ва ватандӯстиву заҳматкашӣ, қабл аз ҳама, хизмати модар мебошад.

Модар, дар ҳақиқат, сазовори ҳама гуна қадршиносӣ, дӯстдорӣ, ғамхорӣ ва эҳтиром мебошад, зеро ӯ меҳрубонтарин инсон барои ҳар як шахс ба шумор меравад.

Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон дар паёмашон, ки санаи 28 декабри соли 2024 ба Маҷлиси Олӣ ироа намуданд, иброз дошта буданд, ки: «Дар фарҳангу тамаддуни мо - тоҷикон, иззату эҳтироми зан-модар ҳамеша ҷойгоҳи хос дорад. Вале бояд гуфт, ки мақому манзалати занону бонувон ва нақши онҳо дар эъмори давлати муосир ва рушди ҷомеа маҳз дар замони соҳибистиқлолӣ воқеан боло рафтааст».

Ман мехоҳам бо ифтихор изҳор намоям, ки модарону занони ноҳияи Зафаробод дар қатори бонувони кишвар бо рафтори нек, андешаи солим ва маҳорату кордонии худ дар ободиву пешрафти диёр саҳми беандоза доранд. Онҳо дар ҳамаи соҳаҳои ҳаёти ҷомеа софдилона кору фаъолият менамоянд ва бо заҳмати бунёдкоронаву ташаббусҳои созандаашон барои рушду нумӯи ноҳияамон саъю талош мекунанд.

Имрӯз дар соаҳои мухталиф, аз ҷумла дар хизмати давлатӣ даҳҳо нафар занону бонувони ноҳия фаъолияти пурсамар доранд. Боиси қаноатмандист, ки санаи 2 феврали соли ҷорӣ дар натиҷаи овоздиҳӣ дар интихоботи баргузоргардида 41 нафар бонувони ноҳия ба боварии мардум сазовор гардида, вакилони маҷлисҳои вакилони халқи вилоят, ноҳия ва ҷамоат интихоб гардиданд.

Имрӯз бонувони ноҳия бо ташаббусҳои худ собит намуданд, ки метавонанд дар ҷодаи соҳибкорӣ низ муваффақ бошанд. Саҳми занону бонувони соҳибкор дар эҳё намудану тараққӣ додани ҳунарҳои мардумӣ ва бо ҳамин роҳ муҳайё кардани ҷойҳои корӣ барои бонувони хонашин басо арзишманду назаррас мебошад.

Мақомоти иҷроияи ҳокимияти давлатии ноҳия баҳри ҳамаҷониба амалӣ гардидани тадбирҳоеро, ки дар доираи барномаҳои қабулшудаи давлатӣ пешбинӣ шудаанд, чораҳои мушаххасро роҳандозӣ менамояд.

Итминон дорем, ки занону бонувони соҳибмаърифат ва бонангу номуси ноҳия бо истифода аз шароиту имкониятҳои муҳайёкардаи Ҳукумати мамлакат барои пешрафти Ватани маҳбубамон содиқона ва боз ҳам бештар заҳмат мекашанд, ба хотири тарбияи наслҳои ояндасоз саъю талоши бештар мекунанд.

Бо ибрози беҳтарин ниятҳои нек бори дигар ҳамаи шумо, модарону бонувони арҷманд ва хоҳарону фарзандони азизро ба ифтихори ҷашни фархундаи Рӯзи Модар табрик мегӯям.

Идатон муборак бод модарони меҳрубон, бонувони гиромӣ ва хоҳарони арҷманд!

Зан - модар олиҳаи ҳусни инсон аст

03 Март 2025

Бузургдошти модар ва эҳтирому қадрдонии заҳматҳои ӯ қарзи ҳар як инсони бо нангу номус аст.  Эмомалӣ Раҳмон

Модар ягона мавҷудотест, ки инсон меофарад, ба ӯ ҳаёт мебахшад. Ӯро дар оғӯши гарму пурмеҳри худ мепарварад. Аввалин суханҳо ва гузоштани нахустин қадамҳоро ба тифлаш ёд медиҳад, фарзанди хешро бо ҳазор нияту орзуҳои нек ба воя мерасонад. Дар замири фарзанд тарбия кардани эҳсоси садоқату самимият,  некию  накӯкорӣ, хайру саховат ва ташаккули маънавии наслҳо натиҷаи заҳмати шабонарӯзии модарони мушфиқу ғамхор ва мӯнису меҳрубон мебошад.

Воқеан, мо дар зиндагӣ ҳеҷ гоҳ наметавонем муҳаббатеро беҳтар ва ҳақиқиву самимитар аз муҳаббати модари худ дарёбем. Аз ин рӯ, модар на танҳо азизтарин шахс барои ҳар як фарзанд аст, балки гаронбаҳотарин сарвати ҳар як халқу миллат мебошад.  Дар яке  аз ривоятҳои куҳан омадааст, ки «Атр аз гул, нӯш аз шаҳд, шодобӣ аз баҳор, риқкат аз абр, меҳр аз офтоб ва зиндагӣ аз замин бардошта, ҳамаро бо якдигар омехта, зан офаридаанд, то зудояндаи ғамҳо ва афзояндаи шодиву нишоти мардум бошад».

Модар аввалин мурраббии башарият аст ва тарбияи инсон аз домони поки ӯ оғоз мешавад. Зан мураббии инсон аст, аммо на мураббӣ ва муаллиме, ки фақат сухан гӯяд, балки ҳамчун модар тамоми  хислатҳои неки  инсониро ба кудак ба таври табиӣ интиқол медиҳад. Рафтору ахлоқи модар дар сифати  сирату сурати фарзанд таъсири бевосита мегузорад. Маҳз модар дар қалби фарзандон тухми меҳру муҳаббат, дӯстиву рафоқат ва некиву накӯкориро мекорад, то оянда насли наврас масъулиятшиносу меҳнатқарин бошад, ободкору инсондӯст ва ватанпарвар ба камол расад. Бузургони гузаштаи адабу фарҳанги мо бо дарназардошти ин нуқтаи ниҳоят муҳим гуфтаанд, ки «Як модари хуб ба сад устод ва омӯзгор меарзад». Зане, ки соҳибмаърифату соҳибҳунар аст, ба масъалаи  пешбурди ҳадафҳои ҷомеа низ эҳтироми хос мегузорад, ба ин хотир, ки дар раванди  созандагӣ ширкат дорад ва ва худ дар сохтани ин ҷомеа саҳмгузор аст.

Зан ҳамчун шахси фарҳангсозу тарбияткунанда агар худ аз воқеияти ҳаёт ва ҷомеа огоҳу бохабар бошад, фарзандон, аҳли оила ва пайвандони худро тарзе тарбият мекунад, ки онҳо баробари ҷомеаи пешрафта қадам ниҳанд.

Бо назардошти ин, Ҳукумати Ҷумҳурии Тоҷикистон ханӯз аз оғози истиқлол ба масъалаҳои марбут ба занон эътибори махсус дода, то имрӯз чандин санади меъёриву ҳуқуқии заруриро ба тавсиб расонидааст. Санадҳои қабулшуда ба таҳкими мақоми зан дар ҷомеа, таъмини риояи ҳукуқу озодиҳои занон, кафолатҳои давлатии баробарҳуқуқии мардону занон ва имкониятҳои баробари амалгардонии онҳо, вусъат додани имконияти иштироки  фаъоли онҳо дар тамоми бахшҳои сиёсӣ, иҷтимоӣ ва фарҳангии кишварамон мусоидат менамоянд. Аз ҷумла, Фармони Президенти Ҷумҳурии Тоҷикистон «Дар бораи тадбирҳои баланд бардоштани мақоми зан дар ҷомеа» ва Қонуни Ҷумҳури Тоҷикистон “Дар бораи кафолатҳои давлатии баробарҳуқуқии мардон ва занон ва имкониятҳои баробари амалигардонии онҳо» ва дигар аз муҳимтарин санадҳое мебошанд, ки барои беҳтар гардидани вазъи иҷтимоии занҳодар ҷомеаи кишвар нақши бориз мебозанд. Ин санадҳо нишондиҳандаи дастгириҳои давлат дар самти ҳавасмандгардонии занҳо ва ҷалби васеи онҳо ба корҳои идоракунӣ мебошад, ки баъди қабули он имтиёзҳои муайян баҳри васеъшавии фаъолнокии сиёсии занон амалӣ гашт.

Пешвои муаззами миллат иброз доштанд, ки “мову шумо нафақат дар як Рӯзи модар, яъне 8- уми март, балки бояд ҳамеша ва доимо нисбат ба модарону хоҳарону духтарони худ ғамхору меҳрубон бошем. Бовар дорам, ки модарону духтарони арҷманди мо минбаъд низ дар риояи муқаррароти қонунҳои Ҷумҳурии Тоҷикистон “Дар бораи танзими анъана ва ҷашну маросим”, “Дар бораи масъулияти падару модар дар таълиму тарбияи фарзанд”, ба ҳаёти мустақилона омода намудани фарзандон, рушди ҳунарҳои мардумӣ ва беҳтар гардидани зиндагии ҳар як оилаи мамлакат нақши арзишманди худро мегузоранд”.

Занону модарони мо метавонанд дар ин раванд низ яке аз қувваҳои пешбарандаи ҷомеа бошанд.  Онҳо инчунин метавонанд дар таҳкими ваҳдати миллӣ, ҳифзи сулҳу суботи сиёсӣ ва фарҳангӣ ва пешбурди сиёсати пешгирифтаи давлат ва Ҳукумати Ҷумҳурии Тоҷикистон  нақши бузург бозанд. Занону модарони тоҷик дар тӯли таърихи чандинҳазорсолаи халқамон ҳамеша чароғи пурфурӯғи хонавода, манбаи меҳр, мазҳари ишқу зебоӣ, намоишгари покӣ, намунаи олии меҳрубонӣ ва чашмаи хушкнашавандаи ҳаёт буданд. Бузургони илму адаб занро шоҳкории табиат ва тоҷи офариниш донистаанд. Сарчашма ва сароғози ҳар кори бузург Зан –Модар мебошад. Меҳру муҳаббати занони тоҷик аз қаъри асрҳо сарчашма гирифта, бо тору пуди ҷашни бузурги миллиамон –Наврӯз омезиш ёфта, ба гулҳои хамешабаҳори Тоҷикистон мубаддал ёфтаанд. Зеро зан ва гул ҷаҳонро зебоӣ мебахшанд.

Аз ин рӯ, суханҳои раҳнамунсозу ҳикматомӯзи Сарвари давлат бояд дастури рӯйимизии ҳар як хонадон ва ташкилоту муассиса бошад. Шарт ва зарур аст, ки қабл аз ҳама мо, модарон, чунин нуқтаҳои инсонпарваронаро гаштаю баргашта мутолиа намоем, омӯзем ва дар ҳаёти ҳаррӯзаамон татбиқ намоем: «Нақш ва мақоми зан дар ҳамаи давру замонҳо дар ҳаёти ҷомеаи башарӣ ҳамчун офарандаи ҳаёт, пайвандгари наслҳо ва низомбахши рӯзгор ниҳоят бузург аст. Гузашта аз ин, зан-модар мураббии аҳли башар ва нахустустоди инсон мебошад. Нақши модар махсусан дар тарбия, омӯхтани забон, таъриху фарҳанг, донишҳои муосир ва умуман, камолоти маънавию ахлоқии фарзанд барҷаста ва ҳатто муайянкунанда мебошад”.

Пас, занону модарон бояд тавре  кору зиндагӣ кунанд, ки рисолати модариро сарбаландона ба ҷо оварда, бо рафтору гуфтор ва хизматҳои софдилонаи худ ба боварию эътимоди Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сазовор бошанд.

Шоиста Исматзода  - ходими илмии Институти таърих, бостоншиносӣ ва мардумшиносии ба номи А. Дониши Академияи миллии илмҳои Тоҷикистон

МУЛОҚОТИ РАИСИ НОҲИЯ БО ХОДИМОНИ ДИН ВА МАСЪУЛИНИ СОҲ

01 Март 2025

Санаи 27 феврали соли 2025 дар толори Мақомоти иҷроияи ҳокимияти давлатии ноҳияи Зафаробод мулоқоти иҷрокунандаи вазифаи Раиси ноҳия Муродзода Муқим Қаюм бо ходимони дин ва масъулини соҳа баргузор гардид. Дар мулоқот ҳамчунин муовини раиси ноҳия – сарпарасти соҳа, сардори Шуъбаи дар ноҳия будаи Раёсати Кумитаи давлатии амнияти миллии Ҷумҳурии Тоҷикистон дар вилояти Суғд, сардори Шуъбаи Вазорати корҳои дохилии Ҷумҳурии Тоҷикистон дар ноҳия иштирок намуданд.

Иҷрокунандаи вазифаи Раиси ноҳия Муродзода Муқим Қаюм мулоқотро оғоз намуда, иброз дошт, ки яке аз нуқтаҳои асосии Паёми Президенти Ҷумҳурии Тоҷикистон ба Маҷлиси Олӣ ин таъмини сулҳу субот, ваҳдати миллӣ ва осоиштагии мардум маҳсуб ёфта, дар раванди ҷаҳонишавӣ ва таҳаввулоти ҷаҳони имрӯза масъулияти давлат ва ҷомеаро дар ҳимояи манфиати миллӣ, фазои орому осоишта бештар мегардонад. Ходимони дин низ бояд дар ин ҷода бетараф набошанд. Гузашта аз он имомони масҷидҳо масъулияти бештар дошта, ҳамкориашон бо раисони маҳалла, нозирони минтаъқавӣ ва ниҳодҳои қудратӣ бояд пайваста ва ҳамарӯза бошад. Ҳамзамон, пеш аз ҳама худи ходимони дин бо амалу рафтор ақидаю мавқеъ ва эҳтироми арзишҳои миллӣ намунаи ибрат бошанд. Ҳамчунин ба масъули ва ходимони дин дастур дода шуд, ки дар моҳи шарифи рамазон бештар мардумро ба меҳру оқибат, хайру саховат ва росткориву ростқавлӣ даъват намуда, аз дурӯғгӯӣ, ҷаҳолат, сухани бад ва дигар амалҳои зишт дур буданро ҳидоят намоянд.

Муовини раиси ноҳия Шарифзода Туйғун оид ба фаъолияти соҳа ҳисобот дода иброз намуд, ки дар ҳудуди ноҳия як адад масҷиди ҷомеи марказӣ, се адад масҷиди ҷомеъ, 27 адад масҷидҳои панҷвақта амал менамоянд. Шумораи кормандони иттиҳодияҳои динӣ 82 нафар ва шумораи ҷои намоз 7680 адад мебошад. Барои бехатарии намозгузорон тамоми воситаҳои зарурӣ омода карда шудааст.

Сардори Шуъбаи дар ноҳия будаи Раёсати КДАМ дар вилояти Суғд Умаров Давлатманд дар баромади худ бештар ба равандҳои номатлуб аз қабили ифротгароӣ, шомил гардидани ҷавонон ба ҳизбу ҳаракатҳои тундрав, моилӣ ба фарҳанги бегона сухан намуда, оид ба саҳми ходимони дин дар мубориза бо падидаҳои номатлуби номбаргардида андешаронӣ намуд.

Сардори ШВКД дар ноҳия Идизода Баҳодур зимни баромадаш қайд намуд, ки мақомотҳои қудратӣ дар ноҳия тамоми кӯшишу талошҳои худро баҳри пешгирии ҷиноятсодиркунӣ ва қонунвайронкуниҳо равона намудаанд. Ӯ вазъи ҷинояткорӣ ва қонуншиканиро таҳлил намуда, таъкид намуд, ки дар пешгирии равандҳои номатлуб ҳамкории мақомотҳои ҳифзи ҳуқуқ ва аҳли ҷомеа, аз ҷумла ходимони дин муҳим мебошад.

Дар фарҷоми мулоқот бурд ва камбудиҳои соҳа баррасӣ гардида, ба масъулин супоришҳои мушаххас дода шуданд.