mt3.org

Хабарҳо

 

Ҳамдиёрони азиз!

Қобили тазаккур аст, ки сиёсати миллии ҳар як кишвари соҳибистиқлол хусусияти хоси худро дошта, мазмуни асосии он дар чорабиниҳои  гуногуни  фарҳангию сиёсӣ  ва рамзу анъанаҳои миллӣ  таҷассум меёбад. Ҳамаи ин  заминаи муҳим  барои  дарки  худшиносӣ   ва  комёб гардидан ба  пешрафту дастовардҳои  кишвар мебошад. Аз ин рў,   «Рўзи  Президент», ки санаи 16  ноябр дар қаламрави  Тоҷикистони азиз ҷашн гирифта мешавад,   иқдоми некест, ки барои  арҷгузорӣ ва ифтихор доштан аз  Тоҷикистони азиз, Истиқлолияти пойдор  ва  қадршиносӣ аз заҳматҳои Президенти кишвар ҳамчун Асосгузори сулҳу ваҳдати миллӣ – Пешвои миллат мебошад.

Аз саҳифаҳои таърих дар ёд дорем, ки 16 ноябри соли 1994 дар иҷлосияи Шӯрои Олии Ҷумҳурии Тоҷикистон маросими савгандёдкунӣ ва ба вазифа шурӯъ кардани Президенти Ҷумҳурии Тоҷикистон баргузор гардида буд. Мақсад аз рузи ид муайян кардани рузи 16 ноябр дар он ифода меёбад, ки ибтидо аз ҳамин рӯзи тақдирсозу муайянкунандаи рушди минбаъдаи бомароми Тоҷикистон марҳилаи нави муҳими давлатӣ, яъне тибқи Конститутсияи давлати соҳибихтиёр дар Ҷумҳурии Тоҷикистон идоракунии президентӣ оғоз ёфта, Президенти тозаинтихобгардида ба иҷрои вазифа шурӯъ намудааст.

Бо манзури эҳтирому эътирофи фазилати сиёсатмадориву давлатдории навини кишвар, таъмини сулҳу ваҳдату ягонагии мардуми сарзамин ва болоравии обруву нуфузу мақоми Тоҷикистони соҳибистиқлоли мо дар арсаи байналмилалӣ, ки ин паёмадҳо дар маҷмӯъ, ба салоҳиятнокиву фаъолияти босамари Президенти Ҷумҳурии Тоҷикистон вобастагӣ дорад, дар қонунгузории кишварамон рузи 16 ноябр рузи Президент пазируфта шудааст.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муьтарам Эмомалӣ Рахмон марди олиму оқилу фозилу хирадмандест, ки давлатро аз фаноёбӣ наҷот дода, мардумро мутаҳҳид намуда, шӯълаи умедро бедор кард ва бо қадамҳои қатъӣ ба сулҳу осоиш, рушду суботи минбаъдаи кишвар ҳидоят намуд.

Ҳамчунин Президенти Точикистон пайваста дар бораи инкишофи соҳаи мактабу маориф, илму маърифат, фароҳам овардани шароитҳои мувофиқ барои таҳсилу касбомӯзӣ ва ҳаёти ҷавонон ғамхориҳо зоҳир менамоянд, ки маҳз тавассути ғамхориҳои доимиву пайгиронаи муҳтарам Эмомалӣ Раҳмон дар солҳои соьибистиылолии кишвар ба ин мақсад шумораи зиёди муассисаҳои оливу миёна, китобхонаву осорхонаҳо, марказҳои варзишиву дилхушӣ сохта шуда, ба ихтиёри ҷавонон пешкаш шудааст.

Дар арсаи байналмилалӣ ҳамчун шахси сулҳофару сулҳпарвар, сарҷамъкунандаи миллату давлат, амалисозандаи заҳматҳои ояндабинона баҳри рушду нумӯъ ва ободии Ватан, ташаббускори ҳалли масъалаҳои глобалӣ шинохта шудани Пешвои миллат, Президенти Жумьурии Тоҷикистонро на танҳо сокинони кишвар, инчунин тамоми мардуми сайёра медонанд ва эътироф намудаанд, ки ин ифтихори мо тожикистониён мебошад.

Аз фурсати муносиб истифода бурда, бо Рӯзи Президенти Ҷумҳурии Тоҷикистон ьамаи Шумо дар дар симои Шумо кулли мардуми ноҳияро самимона муборакбод гуфта, ба хонадони ҳар яки Шумо фазои осоишу меҳру муҳаббат, файзу баракат ва ба диёри биҳиштосои Тоҷикистон гулгулшукуфоии ҷовидонаро таманно менамоям.

 

Тибқи нақшаи чорабиниҳои КИ ҲХДТ дар ноҳияи Зафаробод дар ҳамкорӣ бо бахши кор бо ҷавонон ва варзиши ноҳия бо иштироки аъзоёни ТҶҶ "Созандагони Ватан", устодону шогирдон дар муассисаи таълимии миёнаи умумии рақами 13 ба номи устод Садриддин Айнӣ бахшида ба Рӯзи Президенти Ҷумҳурии Тоҷикистон чорабинии фарҳангӣ гузаронида шуд. Дар чорабинӣ сараввал намоиши осори Пешвои миллат ва асарҳо доир ба фаъолияти шоистаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, Раиси муаззами ҲХДТ ба намоиш гузошта шуд. Сипас маҳфил бо қироати шеъру таронаҳо дар васфи Пешвои миллат, мӯҳтарам Эмомалӣ Раҳмон заҳматҳои шоиставу арзанда, фидокориҳо дар роҳи бунёди Тоҷикистони навин аз ҷониби сарвари маҳбуби халқ ба самъи ҳозирин расонида шуд.

Заррина Зулфиқорзода мудири шӯъбаи кор бо занони КИ ҲХДТ дар ноҳияи Зафаробод табрикоти ҳизбиёни ноҳияро ба самъи иштирокчиён расонид. Чорабиниҳои ҷашнӣ бахшида ба Рӯзи Президенти Ҷумҳурии Тоҷикистон дар ташкилотҳои ибтидоии ноҳияи Зафаробод идома дорад.

 

Маркази иттилоотии КИ ҲХДТ дар ноҳияи Зафаробод

22 октябр Раиси вилояти Суғд Раҷаббой Аҳмадзода ҷиҳати шиносоӣ бо раванди корҳои саҳроӣ ва ҷамъоварии пахта ба ноҳияи Зафаробод сафари корӣ анҷом дод.
Нахуст Раиси вилоят ҳолати кунунии пойгоҳи обкашии “Мирзочӯл-1”-ро мавриди назар қарор дод. Пойгоҳи обкашии мазкур аз шаш агрегат иборат буда, тавассути он заминҳои беканори ноҳияи Зафаробод обёрӣ карда мешавад. Айни замон аз тарафи мутахассисони идораи беҳдошти замин ва обёрии ноҳия таъмири пойгоҳ идома дошта, он барои соли оянда омода мегардад.
Идораи давлатии беҳдошти замин ва обёрии ноҳияи Зафаробод тавассути пойгоҳҳои обкашӣ зиёда аз 32 ҳазор гектар заминро дар мавсим бо оби полезӣ таъмин менамояд. Соли равон аз ҷониби идора ба миқдори 300 миллион метри мукааб ё худ ба маблағи зиёда аз шаш миллион сомонӣ ба хоҷагиҳои кишоварзӣ об расонида шудааст. Дастгирии кишоварзон ва сари вақт бо оби полезӣ таъмин намудани онҳо таҳти таваҷҷӯҳи доимии Пешвои миллат муҳтарам Эмомалӣ Раҳмон қарор дошта, бо ин мақсад барои мавсими соли 2020 аз тарафи Раиси вилоят ба хоҷагии оби ноҳия 1,9 миллион сомонӣ маблағ ҷудо ва дастрас карда шуд, ки дар натиҷа хоҷагиҳои деҳқонӣ бо оби полезӣ таъмин гардиданд.
Зимни шиносоӣ Раиси вилоят таъкид дошт, ки барои сари вақт омода гаштани тамоми пойгоҳҳои обкашӣ мақомоти иҷроияи ҳокимияти давлатии вилоят ҳамаҷиҳата кӯмак мерасонад.
Дар хоҷагии деҳқонии “Турсунзода”-и Ҷамоати шаҳраки Зафаробод Раиси вилоят бо рафти ҷамъоварии пахта шинос гардида, худ бевосита дар ғунучини “тиллои сафед” ва ғанӣ гардонидани хирмани пурбори марди деҳқон саҳм гузошт.
Тавре таъкид гардид, ноҳияи Зафаробод калонтарин ноҳияи пахтакори вилоят ба ҳисоб рафта, соли равон заркорони ноҳия дар майдони умумии 14282 гектар пунбадона кишт намудаанд ва азм доранд наздик 30 ҳазор тонна дури гаронбаҳо ҷамъоварӣ намоянд. То ба санаи 23-уми октябр кишоварзон ва ҳашарчиёни ноҳия 20 ҳазору 608 тонна пахта ҷамъоварӣ намуданд, ки ин 68,9 дарсади нақшаро ташкил медиҳад.
Дар ин рӯз аз тарафи Раиси вилоят ба чинакчиёни беҳтарин туҳфаҳои хотиравӣ тақдим гардид.
Дар идомаи сафари корӣ Раиси вилоят бо фаъолияти корхонаи пахтатозакунии Ҷамъияти саҳҳомии “ДСМ-19” шинос шуд. Корхонаи мазкур дар асоси ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон се сол қабл мавриди баҳрабардорӣ қарор гирифтааст. То кунун корхона аз хоҷагиҳои деҳқонӣ беш аз 3400 тонна пахта қабул намуда, бо истифода аз навтарин дастгоҳу таҷҳизот пахтаро коркард намудааст.
Аснои шиносоӣ Раҷаббой Аҳмадзода ба роҳбарияти ноҳия ва масъулин ҷиҳати боз ҳам васеъ намудани доираи фаъолияти корхона, насби хатҳои нави истеҳсолӣ ва то ба коркарди ниҳоӣ расонидани ашёи хоми саноатӣ - пахта дастуру супоришҳои мушаххас дод.

 

Ҳамдиёрони гиромӣ!

Имрӯз мардуми кишвари азизамон ҷашни 29-солагии Истиқлолияти давлатии Ҷумҳурии Тоҷикистонро таҷлил намуда истодаанд. Ин санаи муборак дар таърихи навини миллати тоҷик ҳамчун тавлиди давлат ва миллати тоҷик сабт гардидааст.

Дар ин лаҳзаҳои фараҳбахш Шумо ҳамдиёрони азизро бо хушҳоливу сарфарозӣ аз номи мақомоти иҷроияи ҳокимияти давлатии ноҳия ба истиқболи сазовори ҷашни маҳбуби миллат, 29-умин солгарди Истиқлолияти давлатии Ҷумҳурии Тоҷикистон табрику таҳният гуфта, бароятон сулҳу осоиш, фатҳу нусрат, иқболи баланд ва барору комёбиҳои беназирро таманно менамоям.

Мавриди зикр аст, ки таҳти сарварии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, фарди сулҳҷӯю сулҳпарвар, ватандӯсту халқпарвар, эҳёгари таъриху тамаддуни миллати тоҷик, сиёсатмадори варзида ва пушту паноҳи мардуми тоҷик муҳтарам Эмомалӣ Раҳмон ҷашни бахтофари миллат-Истиқлолияти давлатӣ ба даст омада, таъриху тамаддуни бою рангини мардуми тоҷик ба ҷаҳониён муаррифӣ гардид ва баҳри расидан ба ҳадафҳои неку созанда заминаҳои мусоид фароҳам оварда шуд.

Дар зарфи 29 - сол мо падидаву омилҳои сиёсиву таърихӣ ва иҷтимоиву фарҳангии миллиро дар марҳилаҳои гуногуни таърихи халқамон омӯхта, бо назардошти таҷрибаи давлатсозиву давлатдории кишварҳои пешрафтаи ҷаҳон роҳи эъмори давлати демократӣ, ҳуқуқбунёд ва дунявиро пеш гирифтем. Ба шарофати Истиқлолият халқи мо соҳиби рамзҳои давлатӣ-Парчам, Нишон ва Суруди Миллӣ гардид.

Ҳамаи ин пирӯзию дастовардҳои наҷиб, роҳҳои равону мувофиқ ба стандартҳои ҷаҳонӣ, нақбҳо, Нерӯгоҳҳои барқӣ, пулу иншоотҳои азими саноатию иҷтимоӣ таҳти сарварии хирадмандонаи Асосгузори сулҳу Ваҳдати миллӣ-Пешвои миллат, муҳтарам Эмомалӣ Раҳмон сурат гирифт ва халқи гавҳаршиноси тоҷик меҳри ин фарди қаҳрамонро дар дилу дидаи худ ҷой дод ва дар атрофи давлату ҳукумати қонунӣ сарҷамъ шуда, баҳри ободонии диёр кору фаъолият доранд.

Маврди зикр аст, ки бо сиёсати хирадмандонаи Пешвои муаззами миллат, имрӯз кишвари азизи мо аъзои комилҳуқуқи Созмони Миллали Муттаҳид буда, бо чандин кишварҳо, ки дар ин ё он арса аҳд ва манофеи муштарак доранд, ҳамкорӣ менамояд.

Бояд қайд намуд, ки Истиқлолият чун ҳадяи бебаҳои таърих, неъмати бузург ва дастоварди беназир ба халки тоҷик буда, таҷлили он ҳамчун тантанаи давлатдории миллӣ ва санаи мубораки таърихиву сиёсӣ мебошад. Истиқлолияти давлатӣ, дар эъмори давлати тозабунёди тоҷикон ва роҳи рушди устувор дар ҷодаи зиндагии озоду осудаи мардум мусоидат намуд. Давра ба давра расидан ба ҳадафҳои созанда аз сиёсати оқилонаи Асосгузори сулҳу ваҳдати миллӣ-Пешвои миллат Президенти мамлакат муҳтарам Эмомалӣ Раҳмон сарчашма гирифта, ба рушду шукуфоии кишвар ҳаммаром гардид.

Доир ба сазовор ва дар сатҳи баланд гузаронидани ҷашни 30-солагии Истиқлолияти давлатии Ҷумҳурии Тоҷикистон дар ноҳия нақшаи чорабиниҳо дар ҳаҷми 390 банд ба маблағи 101 милиону 460 ҳазор сомонӣ ва бо таъсиси 929 ҷойи корӣ тасдиқ карда шудааст. Бо ташаббус ва дастгирии бевоситаи Асосгузори сулҳу ваҳдати миллӣ, Пешвои миллат, муҳтарам Эмомалӣ Раҳмон дар ноҳия корҳои ободонию бунёдкорӣ ба муносибати ин санаи фархунда оғоз гардида, бо маром идома дорад. То ба имрӯз аз 390 банди нақша-чорабиниҳои тасдиқгардида 283 банд ба маблағи 50 милиону 33 ҳазор сомонӣ бо таъсиси 546 ҷойи корӣ иҷро гардид, ки 72,5 фоизи нақшаи тасдиқгардидаро дар бар мегирад.

Чуноне, ки Асосгузори сулҳу ваҳдати миллӣ–Пешвои миллат, муҳтарам Эмомалӣ Раҳмон қайд намудаанд: «Зафаробод диёри родмардон, афроди бонангу номус, ватандӯсту сарбаландон аст. Корномаи пуршарафи фотеҳони Мирзочӯли тоҷик, махсусан наслҳои калонсол, ки бо қаҳрамонию матонат, азму субот чунин як макони ободу дилраборо бунёд намудаанд, дар саҳифаҳои таърихи кишвар абадӣ боқӣ мемонад».

Дар ин лаҳзаҳои тантанавӣ ман аз номи мақомоти иҷроияи ҳокимияти давлатӣ ва кулли сокинони ноҳия ба Ҳукумати Ҷумҳурии Тоҷикистон, мақомоти иҷроияи ҳокимияти давлатии вилояти Суғд, соҳибкорону саховатмандон ҷиҳати маблағгузорӣ дар раванди ободкориву созандагии ноҳия саҳм гузоштаанд, миннатдорӣ баён менамоям.

Бо ибрози волотарин арзишҳои ин неъмати бебаҳои таърих - Истиқлолияти давлатӣ, ки роҳи дурахшони миллати тамаддунофари тоҷикро боз намуд, Шумо ҳамдиёрони азиз ва кулли сокинони ноҳияро самимона табрику муборакбод намуда сиҳатмандиву сарбаландӣ, файзу нусрати зиндагиро дар хонадони ҳар яки шумо таманно менамоям.

Бигзор нури хуршеди Истиқлол фазои муссафои Тоҷикистонро абадан мунаввар сохта, ҷавҳари тобноки он рузгори ҳар сокини кишварро файзбор намояд.

Поянда бод сулҳу ваҳдат ҳамдиливу ҳамбастагӣ ва нерӯи созандаи халқи тоҷик!

Ҷашни фархундаи 29-солагии Истиқлолияти давлатии Ҷумҳурии Тоҷикистон муборак, ҳамдиёрони азиз!

 

РАИСИ НОҲИЯ

АШУРЗОДА РАҶАБ РЎЗӢ

Сомонаҳои расмӣ

Президенти Ҷумҳурии Тоҷикистон

МИҲД вилояти Суғд