11 Сентябрь 2018
Соли равон бобати фароҳам овардани шароитҳои мусоид дар самти хизматрасонии иҷтимоӣ, баланд бардоштани сатҳу сифати таълим, таъсис додани ҷойҳои нави корӣ ва дар ҷамоатҳои шаҳраку деҳоти ноҳия корҳои ободонӣ ва кабудизоркунӣ ба сомон расонида шуд.
Мавриди зикр аст, ки дар арафаи ҷашни 27-солагии Истиқлолияти давлатии Ҷумҳурии Тоҷикистон ифтитоҳи варзишгоҳи замонавӣ дар Ҷамоати шаҳраки Ҳамид Алиев, пас аз азнавсозӣ ба истифода додани бинои иловагии муассисаи таҳсилоти миёнаи умумии №12-и деҳаи Бахти Ҷамоати деҳоти Равшан, азнавсозии Маркази саломатии Ҷамоати шаҳраки Меҳнатобод бо ҳуҷраи хатнасур, азнавсозии бинои таваллудхонаи деҳаи Бахти Ҷамоати деҳоти Равшан ва чароғонкунии кўчаҳои марказии ҷамоатҳои шаҳраку деҳоти ноҳия аз иқдомоти бунёдкоронае мебошанд, ки ба ифтихори ҷашни фархунда мавриди истифода қарор гирифтанд.
Ҷашни 27-солагиии Истиқлолияти давлатии Ҷумҳурии Тоҷикистон дар ҷамоатҳои шаҳраку деҳоти ноҳия бо рўҳияи баланд ва хотирмон бо баргузор намудани барномаҳои фарҳангӣ ва ташкили чорабиниҳои гуногун таҷлил карда шуд. Дар арафаи ҷашн аёдати ятимон, маъюбон, оилаҳои ниёзманд ва бепарастор ба роҳ монда ба онҳо кўмакҳои моддӣ расонида шуд.
Санаи 7 сентябр ҷашни 27-солагии Истиқлолияти давлатии Ҷумҳурии Тоҷикистон дар назди муҷассамаи Исмоили Сомонӣ бо иштироки оммаи васеи сокинони ноҳия бо шукўҳ таҷлил карда шуд. Дар чорабинии идонаи ҷашнӣ намояндаи Ҳукумати Ҷумҳурии Тоҷикистон - Раиси Кумитаи бехатарии озуқавории назди Ҳукумати Ҷумҳурии Тоҷикистон муҳтарам Камолзода Фарҳод Воҳид, намояндаи мақомоти иҷроияи ҳокимияти давлатии вилояти Суғд Абдураҳмонзода Икром иштирок намуда, табрикоти Ҳукумати Ҷумҳурии Тоҷикистон ва Раиси вилоятро ба саҳми сокинони ноҳия расониданд. Инчунин гурўҳи меҳмонон аз Ҷумҳурии Узбекистон бо роҳбарии муовини якуми ҳокими ноҳияи Ховаси вилояти Сирдарё, Маҳмудов Ислом Исмоилович дар чорабинии идона иштирок намуда, суханрони намуданд. Раиси ноҳия муҳтарам Ашурзода Раҷаб Рузи дар чорабинӣ суханрони намуда ҳозирин ва меҳмононро бо ҷашни 27 солагии Истиқлолияти давлатии Ҷумҳурии Тоҷикистон муборакбод намуданд. Аз ҷониби бахши фарҳангӣ ноҳия барномаи идонаи фарҳангӣ намоиш дода шуд.
Сокинони ноҳия бо шукргузорӣ аз сиёсати имрўзаи Ҳукумати мамлакат таҳти роҳбарии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо ифода намудани рўҳияи баланди идона, ҷашни 27-солагиии Истиқлолияти давлатии Ҷумҳурии Тоҷикистонро истиқбол намуданд.
